Az. Agr. Chesini Antonio

La storia de la vigna e del vin en Valpolesela l'è una storia assé particolar e straordinaria. I nostri antenati, fin dai tempi antichi i'han dovut sbancar i monti par spacar i grugni de masegna che vansaan su e doperando i marocoli che vegnean fora i'han fato su le marogne en modo da far fora quare e banchete a mo' de terase par piantarghe en sima i filari de vigne ma anca oliari e siresari. Serte marogne le g'han dei sasi da diese quintai encastré a la perfesion tanto che la par rocia compata e le ghe da al paesajo de la Valpolesela en senso de paesajo modificat ad arte da l'omo en de i secoli ma en armonia col teritorio. En questo modo, esendo le nostre coline en batua del sol vegnea fora l'uua piassé bona anca parché el teren, a difarensa de la pianura, el g'ha el toar che l'è en gran parte calcar e l'è quel che ghe vol parché vegna fora el vin bon.

 

N'antra partecolarità de la Valpolesela i'è le varieté de uue che coltiem, la Corvina che l'è la regina, el Corvinon che l'è el piassé bon, la Rondinela che l'è la piassé bela e la Useleta che l'è una gran bona uueta. La Molinara l'è pitosto ciara e donche oramai l'è pitosto rara. Tute ste uue ki i'è uue vecie del posto e cioè le gh'è solo en Valpolesela e fin al Lago de Garda e i'è coltié da sempre ki da noantri e solo ki. Ma la particolaretà piassé importante, che l'è dal bon na roba piassé unica che rara en de'l panorama vinicol mondial, l'è la tecnica de l'apasimento che anca quela l'è 'na tradision vecia fiso dato che el de parla parfin Cassiodoro, el ambasador del Rè de i Ostrogoti Teodorico de Verona, en de'l quinto secolo. I nostri veci quan i arsemaan i cataan fora le recie de uua e i arsimi piassé boni da le pergole en postera e i le metean zo spargola su le arele en de i granari e su le tese a strinarse fin anca de febrar par far l'Amarone e fin anca de april parché riesa el Recioto. Donche, quan i le mostaan l'era ancora inverno e el mosto el boiea a pian en del gel e el ciapaa ancora piassé qualità parché el stasea anca piassé de en mese su le so graspe cavandoghe i aromi e anpò el fredo el fa si che questi aromi i ghe resta en de'l vin. A sto punto, l'Amarone o el Recioto l'era fato e bastaa metarlo en de i vesoti de roaro e de sireso a maurar almanco par tri ani.

 

La nostra fameia da sempre la segue questa tradision con en gran amor par tuta questa cultura. En de'l 1927 Battista Chesini L'ha fato su la cantina nova a Gargagnago “Borgo de l'Amarone”, nel comune de Sant'Ambrosio de Valpolesela, aumentando la produsion e guadagnandose la stima de tanti clienti, specialmente le ostarie de la zona. En de'l 1968 Antonio Chesini, fiol de Batista e atual titolar, el acquista la conca del rinomato “Vajo de l'Armaron” e soratuto en de'l 1977, el “Monte de la Traversagna”, splendida campagna de  30 ettari, con corte rustica e colombara del 1500, en posision dominante, a 300 metri de altitudine sora a Gargagnago “Borgo de l'Amarone”. L'è ki che en de'l 2003 Antonio con noantri fioi Leone, Giovanni e Mario e la mama Rosetta, decidem de costruir una cantina nova col frutar de sora; en compleso modern e eficente ma con una architetura tipica de la nostra zona. La nostra mision l'è la tipicità e la qualità asoluta.

 

 

 

La struttura aderisce all'iniziativa Insieme per la Valpolicella.
 

 

 

Clicca QUI per procedere nel download del buono sconto e visualizzare l'elenco aggiornato degli aderenti.




Dove siamo

Via Case Sparse Traversagna 5, 37015, Sant'Ambrogio di Valpolicella
Tel: +39 3335294286
Fax: +39 045 7701854


RICHIEDI INFORMAZIONI

Nome Cognome
Telefono E-mail
Messaggio
Dichiaro di aver letto l'Informativa sulla Privacy.
   No
SANT'AMBROGIO DI VALPOLICELLA... VEDI ANCHE:

» Cantine

» Dove Dormire

» Dove Mangiare

» Cosa Fare


Calendario eventi
Luglio 2019




Sponsor




I COMUNI DELLA VALPOLICELLA
CONSORZIO PRO LOCO VALPOLICELLA
via Ingelheim, 7 - 37029 - San Pietro in Cariano, Verona, Italy
Tel./fax +39 045 7701920 - info@valpolicellaweb.it